“І сёння з намі Колас і Купала”

Да 140-годдзя з дня нараджэння народных паэтаў Беларусі Янкі Купалы і Якуба Коласа ў сельскай бібліатэцы-клубе №8 в.Вялікая Ухалода пачала работу кніжная выстава “І сёння з намі Колас і Купала!”.

У кожнай нацыянальнай літаратуры ёсць імёны, творчасць якіх найбольш поўна адлюстроўвае духоўнае жыццё і думкі народа. Янка Купала і Якуб Колас – таленавітыя стваральнікі неўміручых паэтычных твораў і мастацкай прозы. Яны – нацыянальныя прарокі літаратурна-паэтычнай духоўнай думкі Беларусі. З іх імёнамі звязана станаўленне і развіццё беларускай літаратуры XX стагоддзя, фарміраванне беларускай літаратурнай мовы.

Выстава складаецца з трох раздзелаў: "Якуб Колас: летапіс жыцця і творчасці", "У вянок беларускім песнярам", "Старонкі неўміручай спадчыны Янкі Купалы ".

У раздзеле “Якуб Колас: летапіс жыцця і творчасці” прадстаўлены матэрыялы пра жыццё і творчасць пісьменніка, успаміны, нарысы, эсэ, а таксама мастацкія творы.

У раздзеле “Старонкі неўміручай спадчыны Янкі Купалы” змешчаны літаратуразнаўчыя матэрыялы пра яго жыццё і творчасць.

Раздзел “У вянок беларускім песнярам” знаёміць з паэтычнымі і літаратурнымі працамі нашых землякоў.

Якуб Колас і Янка Купала пакінулі пасля сябе велізарную творчую спадчыну.